Greenland Contractors (GC) Kalaallit Nunaanni suliffiit annersat ilagaat. Taamaammat nunatsinnit inuusuttunik suliffimmi ilinniartuuteqarneq peqataaffigilluarparput.
Pituffimmi suliffitsinni sulinermut sungiusarfissannik neqeroorfigisinnaavatsigit. Sulifimmi sungiusarneq atuarnermik ilassutigineqassaaq ilinniarfinni Namminersorlutik Oqartussat ataaniittunik.
Pingaartitarivarput Pituffimmi ilinniartuutillutit sukumiisumik suliamut tunngasumik ilinniartinneqarnissat, inuttut ineriartornissat, namminersorsinnaanissat kiisalu akisussaaffeqarsinnaanissat.
Pituffimmi suliamut aalajangersimasumut ilinniartuunerpit saniatigut oqaatsitigut inuiaassutsit assigiinngitsut akornanni ineriartornissannut periarfissaqarluarputit. Illillu tamanna iluaqutigilluarsinnaavat Danmarkimi imaluunniit nunani allani ilinniaqqikkusussaguit.
Ilinniartunut 25-nut inissaqartitsivugut. Quppermi saamiatungaani iserfissat qimerloorlugit suliami aalajangersimasumi sorlerni ilinniagaqartoqarsinnaaffiit paasisaqarfigisinnaavatit.
Ilinniartunut ilitsersuisoq (Youth Advisor)
Pingaartinneqarpoq ilinniartut ataqatigiinnissaat sammeqatigiittarnissaallu. Ilinniartunut ilitsersuisumik (Youth Advisorimik) sulisoqarpugut, ilinniartuutillutit inuttut suliffitsigulluunniit ajornartorsiuuteqassagaluaruit saaffigisinnaasannik.Ilinniartunut ilitsersorti sunngiffimmi sammisassaqartitsinissaminut pilersaarusiortarpoq, soorlu sisorariarnernik, asiarnernik nereqatigiinnernillu.
Ineqarnermut tunngasut
Ilinniartunut najugaqarfiit (barakkit) marluk Barak #203 #206-ilu Greenland Contractorsip pilersinnikuuai. Barak 203-mi 15 m2-it missaannik angitigisunik 13-inik ineeraqarpoq. Taakku tamarmik immikkut siniffimmik, allaffimmik atisaasivimmillu pequtsersornikuupput. Assinik kusassaatinilluunniit allanik nammineq pigisannik nassataqarluarsinnaavutit ineeqqat iseruminarsarnissaanut angerlarsimaffippalaartunngortinnissaanullu atorluarsinnaasannik. Barak #206-imi qulingiluanik ineeraqarpoq Barak #203 assingalugu pequtsersorneqartunik.Ilinniartunut ilitsersorti Barak #206-mi namminerisaminik inissiaqartinneqarpoq.
Ilinniartunut barakkit ataatsimoorussanik ineqarput, igaffeqarput, uffarfeqarput perusuersartarfeqarlutillu. Barakkit taakku immikkut qarasaasiaqartinneqarput internettimut killilimmik attaveqaartumik.
