GC-mi sulerisarpat?

Pituffik illoqarfittut mikinerusutut assersuunneqarsinnaavoq. Kalaallit Nunaata Kitaata avannarpasinnerpaaffiani inukitsumi orneriaannanngitsumilu inissisimagaluarluni ulluinnarmi sorpassuarnik peqartariaqarpoq suulluunniit ingerlatsinermi pisariaqartut pinngitsoorsinnaanagit. Assersuutigalugit sakkutooqarfik mittarfeqarpoq, namminerisamik qatserisarfeqarluni, tamassalu atuagaateqarfik, bowlingertarfik, akunnittarfik, iffiorfik, soorunalumi aamma sulisunut najugarfeqarpoq.

GC-p suliassarivaa ulluinnarni pisariaqartitaasut sakkugalugit Pituffiup ingerlannissaa. Pineqarput inuiaqatigiinni atortulersuineq, innaallagissiorneq, napparsimaveqarneq, ineqarfeqarneq sunngiffimmi sammisassat il. il. Naatsumik oqaatigalugu GC-p illoqarfeeraq ingerlappaa.

Amerikamiut US Air Forceata sakkutooqarnermut tunngasut akisussaafigalugit suliarivai, tamatuma avataanut tunngasut tamaasa GC-p akisussaaffigalugit.

GC-p suliassai assigiiaanngingaarmata sulisuminut sulilerusuttunullu assigiinngitsunik pilerinartunik immikkuullaarissunillu suliffissanik neqerooruteqartarpoq.

GC ingerlatsinermini immikkoortortaqarfinni ukunani aaqqissugaavoq: Program Management, Human Resources, Health Services, IT Department, Accounting & Administration, Engineering kiisalu Supply. Taakkulu saniatigut marlunnik anginerusunik immikkoortortaqarfeqarpoq pingaarnerusumik ingerlatsinermik suliaqartartuusunik tassaappullu Operations aamma Services.